É posible que Albert Einstein (para os que teñades dúbidas, é o da lingua 🙂 ) fora o primeiro científico cunha importante proxección mediática, o que fixo que ao redor da súa persoa xurdiran todo tipo de historias elevadas á categoría de lendas. Tamén é posible que ese carácter burlón e aspecto extravagante reforzaran moitas delas.
Cantos de nós escoitamos iso de que “tamén Einstein suspendía Matemáticas”. Teño que dicir que este dato en particular non é correcto. É un feito que as súas Matemáticas non estaban ao nivel da súa Física pero de aí a suspender…
Dous anos antes do que lle correspondería, presentouse ás probas de acceso para entrar no Instituto Politécnico de Zúrich e a pesar de non superalas (a nota de Francés, por exemplo, non era suficientemente 
boa) os seus exames de Física e Matemáticas foron excepcionais. Tanto foi así que aseguraron o seu ingreso no seguinte curso e un dos seus futuros profesores ofreceulle que asistira como oínte ás súas clases.
Durante os seus estudios no Politécnico, Einstein non foi un alumno demasiado querido polos seus profesores, que advertían nel unha actitude desafiante nunhas ocasións e aparentemente pasiva en exceso noutras. Un deles chegou a dicirlle a Albert que era un caso perdido para a Física 🙂 .
Se queredes coñecer máis detalles da azarosa vida de Einstein e do seu impresionante legado, recoméndovos El Universo de Einstein, de Michio Kaku, que actualmente estou lendo.
Ciencia + Tecnoloxía 