O uso racional da tecnoloxía é un asunto moi importante no que todos temos moito que aprender. En ecomicrosiervos atoparedes case diariamente consellos para optimizar os recursos e poñer o noso gran de area no aforro de enerxía.
Consellos ecolóxicos
E contaminación lumínica no mundo
Seguro que logo de ver o mapa da contaminación lumínica na península non erades capaces de comezar as vacacións de Semana Santa sen saber como é a distribución no mundo, verdade? 🙂
Pois dádelle as gracias ao responsable de Astronomía na Beirarrúa que hoxe me deixou esta impresionante imaxe no meu buzón (facede clic na imaxe para vela máis grande). Trátase dunha foto real, composta a partir de moitas tomas individuais, que nos indica onde é máis difícil ver estrelas. Vedes algunha relación co nivel de desenvolvemento dos países?
Boas vacacións para todos vós!!!
Contaminación lumínica na península
Non é a primeira vez que falamos da contaminación lumínica neste blog e hoxe amosamos o mapa da contaminación lumínica na península ibérica que nos chega vía ecomicrosiervos. A pesar de estar elaborado en base a cálculos e non a observación directa, dá unha boa idea de cal é a realidade.
Sabede que nas zonas máis contaminadas, aquelas que no mapa aparecen en branco e vermello, só poderiamos distinguir un máximo de 150 estrelas nunha noite despexada, mentres que nas zonas menos contaminadas (azul escuro e negro no mapa) poderiamos superar as 3000 estrelas.
Deberiamos ser capaces de atopar o equilibrio entre unha iluminación urbana aceptable e un nivel de contaminación lumínica baixo. Que ideas se vos ocurren? Pensades que os farois que iluminan as rúas están ben deseñados?
Día Mundial da Eficiencia Enerxética
Sabiades que o día 5 de Marzo é o Día Mundial da Eficiencia Enerxética? Acabo de lelo en ecomicrosiervos e tamén que se levarán a cabo iniciativas tan interesantes como o troco de lámpadas de incandescencia por lámpadas de baixo consumo (sabedes que porcentaxe do gasto eléctrico nun fogar é debido á iluminación?).
Temos que ser capaces de manter a nosa calidade de vida cun menor custo enerxético e iso pasa por un mellor aproveitamento dos recursos. O obxectivo: reducir a contaminación, prolongar a vida dos recursos e poñer o noso gran de area para frear o cambio climático.
Como exercicio, propóñovos que cada un de nós revise os seus hábitos e adique cinco minutos a pensar como pode consumir menos enerxía.
Telefonía ecolóxica
Cada vez que cambiamos de teléfono móbil adoitamos desfacernos do vello e de todos os seus compoñentes e accesorios. Con esta práctica tan habitual, estamos xerando residuos que ademais no caso das baterías, son altamente contaminantes.
En países como Xapón xa toman medidas como por exemplo que os cargadores de móbil sexan universais, é dicir, que sexan válidos para todos os modelos de móbiles e desta forma ao cambiar de teléfono non é necesario cambiar o cargador.
Entereime hai uns días vía No puedo creer que lo hayan inventado dun novo accesorio que se comercializa nese país. Trátase dunha placa solar que por exemplo podes pendurar do teu móbil, de maneira que se vai cargando ao longo do día proporcionando 35 minutos de batería logo de 6 horas de carga.
Xa sabemos que 35 minutos dan para moi pouco e que a carga da placa é lenta, sen embargo é un bo comezo na percura de alternativas e unha solución de emerxencia estupenda para cando quedamos sen batería no momento menos oportuno.
Tecnoloxía + reciclaxe
O teléfono da imaxe acaba de ser presentado na Mobile World Congress e a súa importancia radica en que está construído maiormente con materiais de refugallo: a carcasa de aluminio procede de latas de refresco, as teclas están fabricadas con pneumáticos de coche e moitos dos elementos de plástico que presenta proveñen de botellas.
Aínda non se comercializa, pero ademais de ser unha interesante declaración de intencións é unha proba de que é posible lanzar un producto competitivo e respectuoso co medio ambiente. Podedes presumir de que nós levamos anos facendo isto no taller de Tecno 🙂
Vía ecomicrosiervos
Enerxías renovables
La generación del sol é unha páxina que contén moitísima información acerca das enerxías renovables en xeral e da enerxía solar en particular.
Na sección La escuela del sol e en particular no apartado de Aplicaciones prácticas encontraredes as instrucións necesarias para construír, por exemplo, un reloxo solar.
Fonte: What’s New
Contaminación lumínica
A contaminación lumínica é sempre a grande esquecida cando se fala de impacto medioambiental, sen reparar no despilfarro enerxético que supón ou en como reduce de forma considerable a visibilidade do ceo nocturno.
Na defensa da calidade do ceo nocturno como dereito científico, cultural e medioambiental da Humanidade existen iniciativas a nivel internacional como Star Light.
Sabedes que é posible determinar o nivel de contaminación lumínica da vosa cidade simplemente contando estrelas? Visitade a páxina de Great World Wide Star Count e participade na convocatoria que se celebrará no Outono do presente ano.
A imaxe é unha fotografía tomada en Tenerife que nos presenta o blog sobre ecoloxía e medioambiente
Enlaces de interese: Desxeo do Ártico
Interesante artigo publicado o día 30 de Setembro de 2005 no xornal El País acerca da perda da masa de xeo no Ártico e as súas consecuencias para o clima.
Para descargar este enlace, facede clic enriba del co botón dereito do rato e seleccionade a opción Guardar destino como…
Ciencia + Tecnoloxía 
