Lembrade que a asistencia é totalmente voluntaria e que non terá incidencia na nota máis aló de permitirvos dispor de máis tempo para rematar os vosos proxectos.
O taller abre nos recreos
Próximos exames…
Déixovos as datas dos próximos exames e a materia que entra en cada un deles:
- 2ºC: Exame de electricidade (unidade 2) o día 17 de Decembro (venres)
- 4ºA: Exame de electrónica dixital (unidade 2) o día 17 de Decembro (venres)
- 4ºD: Exame de forzas (unidade 3) o día 15 de Decembro (mércores)
Aproveito tamén para lembrarvos aos alumnos de 2ºC que a data límite para entregar o boletín de exercicios de electricidade é o 10 de Decembro e que pasado este día non o recollerei.
Photo credit: cohdra from morguefile.com
Furoca TV
No IES de Pastoriza estreamos canle de televisión, Furoca TV!!! Parabéns a todos os responsables!!!
O INTA organiza un concurso para escolares
Vía tecnoloxía da ESO, leo que o Instituto Nacional de Técnica Aeroespacial (INTA) organiza un concurso para escolares no que poden participar entre outros, os alumnos de 2º ciclo da ESO.
Día Internacional da SIDA
As palabras que tiñamos na porta de clase entraron na aula
para deixar sitio ao lazo vermello que estará pegado durante toda esta semana.
Proxecto Acer-European Schoolnet
O curso pasado o IES de Pastoriza foi seleccionado para participar no proxecto ACER-EUN cun grupo de 1º de ESO. No presente curso participaremos cos catro grupos de 2º de ESO e eu incorpórome (a través da asignatura de Tecnoloxías) a esta iniciativa tan interesante que pretende explorar o uso educativo do ultraportátil nas aulas.
Manifesto por unha rede neutral
Os cidadáns e as empresas usuarias de Internet adheridas a este texto MANIFESTAMOS:
- Que Internet é unha Rede Neutral por deseño, dende a súa creación até a súa actual implementación, na que a información flúe de maneira libre, sen discriminación ningunha, en función de orixe, destino, protocolo ou contido.
- Que as empresas, emprendedores e usuarios de Internet puideron crear servizos e produtos nesa Rede Neutral sen necesidade de autorizacións nin acordos previos, dando lugar a unha barreira de entrada practicamente inexistente que permitiu a explosión creativa, de innovación e de servizos que define o estado da rede actual.
- Que os usuarios, emprendedores e empresas de Internet puideron definir e ofrecer os seus servizos en condicións de igualdade, levando o concepto da libre competencia até extremos nunca antes coñecidos.
- Que Internet é o vehículo de libre expresión, libre información e desenrolo social máis importante co que contan os cidadáns e empresas. A súa natureza non debe ser posta en risco baixo ningún concepto.
- Que para posibilitar esa Rede Neutral as operadoras deben transportar paquetes de datos de maneira neutral, sen erixirse en “aduaneiros” do tráfico e sen favorecer ou prexudicar a uns contidos por riba doutros.
- Que a xestión do tráfico en situacións puntuais e excepcionais de saturación das redes debe acometerse de xeito transparente, de acordo a criterios homoxéneos de interese público e non discriminatorios nin comerciais.
- Que a dita restrición excepcional do tráfico por parte das operadoras non pode converterse nunha alternativa sostida á inversión de redes.
- Que a dita Rede Neutral se ve ameazada por operadoras interesadas en chegar a acordos comerciais polos que se privilexie ou degrade o contido segundo a súa relación comercial coa operadora.
- Que algúns operadores do mercado queren “redefinir” a Rede Neutral para manexala de acordo cos seus intereses, e esa pretensión debe ser evitada; a definición das regras fundamentais do funcionamento de Internet debe basearse no interese de quen a usan, non de quen as proven.
- Que a resposta ante esta ameaza para a rede non pode ser a inacción: non facer nada equivale a permitir que intereses privados poidan de facto levar a cabo prácticas que afectan ás liberdades fundamentais dos cidadáns e a capacidade das empresas para competir en igualdade de condicións.
- Que é preciso e urxente instar ao Goberno a protexer dun xeito claro e inequívoco a Rede Neutral, co fin de protexer o valor de Internet de cara ao desenrolo dunha economía máis produtiva, moderna, eficiente e libre de inxerencias e intromisións indebidas. Para iso é preciso que calquera moción que se aprobe vincule de xeito indisolúbel a definición de Rede Neutral no contido da futura lei que se promova, e non condicione a súa aplicación a cuestións que pouco teñen que ver con esta.
A Rede Neutral é un concepto claro e definido no ámbito académico, onde non suscita debate: os cidadáns e as empresas teñen moito dereito a que o tráfico de datos recibido ou xerado non sexa manipulado, terxiversado, impedido, desviado, priorizado ou retrasado en función do tipo de contido, do protocolo ou aplicación empregado, da orixe ou destino da comunicación nin de calquera outra consideración allea á da súa propia vontade. Ese tráfico tratarase como unha comunicación privada e exclusivamente baixo mandato xudicial poderá ser espiado, trazado, arquivado ou analizado no seu contido, como correspondencia privada que é en realidade.
Europa, e España en particular, atópanse no medio dunha crise económica tan importante que obrigará ao cambio radical do seu modelo produtivo e a un mellor aproveitamento da creatividade dos seus cidadáns. A Rede Neutral é crucial á hora de preservar un ecosistema que favoreza a competencia e innovación para a creación dos innumerábeis produtos e servizos que quedan por inventar e descubrir. A capacidade de traballar en rede, de xeito colaborativo, e en mercados conectados, afectará a todos os sectores e todas as empresas do noso país, o que converte a Internet nun factor clave actual e futuro no noso desenrolo económico e social, determinando en gran medida o nivel de competitividade do país. De aí a nosa profunda preocupación pola preservación da Rede Neutral.
Por todo iso instamos con urxencia ao Goberno español a ser proactivo no contexto europeo e a lexislar de xeito claro e inequívoco neste sentido.
Esta entrada é unha tradución do Manifiesto por una red neutral no blogue de Enrique Dans. Síntete libre de reproducir, traducir e compartir isto onde quixer.
Pizarras de MRUA e funcións cuadráticas
Mañá temos o exame de MRUA e funcións cuadráticas. Déixovos as pizarras dos exercicios que resolvimos en clase ao longo de todos estes días. Lembrade traer calculadora!!!
Photo credit: cohdra from morguefile.com
Un oso amoroso e un par Darlington
Algúns xoguetes como o da imaxe activan o seu dispositivo de saída (unha melodía, unha luz,…) cando o usuario toca dous puntos que fan que un circuíto eléctrico se peche.
Como funcionan? Nesta situación, o corpo do usuario forma parte do circuíto cunha determinada resistencia que en principio faría que a intensidade establecida fora insuficiente para activar o dispositivo de saída. Isto pode solucionarse cunha etapa de amplificación con transistor.
O transistor amplifica a intensidade que entra a través da súa base, proporcionando unha intensidade de colector que dependerá da intensidade de entrada e da ganancia do transistor.
Pode suceder que o transistor non sexa quen de proporcionar unha intensidade suficientemente alta para activar o dispositivo de saída, e nese caso será preciso amplificar aínda máis a intensidade que entra pola base.
Esta operación pode realizarse cun par Darlington, onde dous transistores se conectan como se indica na figura, de maneira que a ganancia do conxunto é o produto das ganancias de ambos.
No vídeo, os alumnos de 4ºA fixeron unha cadea colléndose das mans para pechar o circuíto, agarrando un deles o cable conectado ao polo positivo da pila e outro, o cable conectado á base do primeiro transistor.
Como resultado, o LED conectado no colector do segundo transistor acéndese cando a cadea está pechada e apágase no momento en que a cadea se abre nalgún punto, pois nesa situación temos un circuíto aberto. A configuración Darlington permite que a intensidade que circula polo LED sexa suficiente para acendelo a pesar da resistencia introducida pola inclusión de 13 persoas no circuíto!
Ciencia + Tecnoloxía 
